Story Image
პოლონეთის სასაზღვრო სამსახურმა ქვეყნიდან გაძევების გადაწყვეტილება მიიღო რუსეთისა და ბელარუსის 15 მოქალაქის მიმართ, რომლებმაც დაწესებული სანქციებისა და შეზღუდვების გვერდის ავლით კარატეს მსოფლიო ჩემპიონატზე მონაწილეობის მიღება სცადეს.

ჯგუფი, რომელიც ბელარუსის 11 და რუსეთის 4 მოქალაქისგან შედგებოდა, პოლონეთში ტურისტული ვიზებით იმყოფებოდა. ისინი სამართალდამცველებმა ქვეყნის სამხრეთში მდებარე ქალაქ ბიელსკო-ბიავაში დააკავეს, სადაც კადეტთა, იუნიორთა და 21-წლამდელთა შორის მსოფლიო პირველობა კვირას დასრულდა.

სასაზღვრო სამსახურის პრესსპიკერის განცხადებით, 15-ვე პირს ქვეყნის დასატოვებლად 8-დღიანი ვადა მიეცა - ეს არის კანონით გათვალისწინებული ყველაზე მოკლე პროცედურული ვადა.

აკრძალვის გვერდის ავლით ასპარეზობის მცდელობა

პოლონეთის კარატეს კავშირის პრეზიდენტმა, პაველ პოლტორჟეცკიმ აღნიშნა, რომ ორგანიზატორებს წინასწარ ჰქონდათ ინფორმაცია მოსალოდნელი პროვოკაციის შესახებ. მისი თქმით, მსოფლიო კარატეს ფედერაციისა და პოლონეთის სპორტის სამინისტროს მიერ დაწესებული მკაცრი შეზღუდვების მიუხედავად, რუსი და ბელარუსი სპორტსმენები ტურნირზე შეპარვას გეგმავდნენ.

როგორც ირკვევა, დაკავებული პირები ვარაუდობდნენ, რომ შეჯიბრების ადგილზე გამოცხადების შემდეგ მათ ასპარეზობის უფლებას ადგილობრივად მისცემდნენ და მონაწილეთა სიას ბოლო მომენტში დაამატებდნენ.

„პირველი განგაშის სიგნალი მსაჯთა კურსებზე რუსეთის მოქალაქის გამოჩენა გახდა. სწორედ მაშინ განხორციელდა პირველი დაკავება,“ - განაცხადა პოლტორჟეცკიმ.

აღნიშნული ინციდენტის შემდეგ ტურნირის ორგანიზატორებმა ოფიციალურად მიმართეს სასაზღვრო პოლიციას ვითარებაში გარკვევისა და შემოწმების ჩატარების თხოვნით.

სილეზიის სასაზღვრო დანაყოფის წარმომადგენლის, შიმონ მოსციცკის განმარტებით, ოფიცრებმა ჯგუფის ყველა წევრის სამართლებრივი სტატუსი დეტალურად შეამოწმეს.

„ბელარუსის 11 და რუსეთის 4 მოქალაქე პოლონეთის ტერიტორიაზე ტურისტული ვიზებით იმყოფებოდა, რაც სრულად ეწინააღმდეგებოდა მათ მიერ დეკლარირებულ რეალურ მიზანს - სპორტულ ღონისძიებაში მონაწილეობას,“ - აღნიშნა მოსციცკიმ.

სასაზღვრო პროცედურების დასრულებისთანავე 15-ვე პირს ქვეყნიდან იძულებითი გაძევების ოფიციალური ბრძანება გადაეცა, რომლის მიხედვითაც მათ პოლონეთი 8 დღის ვადაში უნდა დატოვონ.

ცნობისთვის, აღნიშნულ მსოფლიო ჩემპიონატზე პოლონელმა სპორტსმენებმა ორი მედალი - ოქრო და ბრინჯაო მოიპოვეს.