პოლონეთში 27 ივლისს ამინდის მკვეთრი გაუარესებაა მოსალოდნელი. ქვეყნის მეტეოროლოგიისა და წყლის მართვის ინსტიტუტის (IMGW) პროგნოზით, დღის განმავლობაში არაერთ რეგიონში მოსალოდნელია ძლიერი ჭექა-ქუხილი, ინტენსიური წვიმა, სეტყვა და ძლიერი ქარი.

სინოპტიკოსების ინფორმაციით, შტორმული სისტემა ქვეყნის დასავლეთ ნაწილიდან დაიწყებს გავრცელებას და დღის განმავლობაში აღმოსავლეთის მიმართულებით გადაინაცვლებს. შედარებით მშვიდი ამინდი, წინასწარი პროგნოზით, მხოლოდ ჩრდილო-დასავლეთ რეგიონებში შენარჩუნდება.

სამხრეთ-აღმოსავლეთ პოლონეთში ყველაზე მაღალი რისკია

IMGW განსაკუთრებულ ყურადღებას ამახვილებს სამხრეთ-აღმოსავლეთ რეგიონებზე, სადაც უამინდობა ყველაზე ინტენსიური იქნება. სპეციალისტების შეფასებით, ცალკეულ რაიონებში მოსალოდნელია:

• ნალექი 40 მმ-მდე;
• ქარის სიჩქარე საათში 90 კმ-მდე;
• სეტყვა, რომლის დიამეტრი დაახლოებით 3 სანტიმეტრს მიაღწევს.

ასეთი ზომის სეტყვამ შესაძლოა ავტომობილები, სახურავები და სასოფლო-სამეურნეო კულტურები დააზიანოს.

რატომ უარესდება ამინდი?

მეტეოროლოგების განმარტებით, ატმოსფერული ცვლილებები სკანდინავიისა და ნორვეგიის ზღვის მიმართულებიდან გავრცელებულ დაბალი წნევის სისტემას უკავშირდება. გრილი ჰაერის მასები პოლონეთის ტერიტორიაზე თბილ და ტენიან ჰაერთან შეჯახების შედეგად ქმნის პირობებს ძლიერი ჭექა-ქუხილისა და შტორმების განვითარებისთვის.

IMGW არ გამორიცხავს, რომ ზოგიერთ რაიონში შტორმები მრავალუჯრედიან სისტემებად ჩამოყალიბდეს, ხოლო ცალკეულ ადგილებში სუპერუჯრედული შტორმებიც განვითარდეს, რომლებიც განსაკუთრებით ძლიერი ამინდის მოვლენებით გამოირჩევა.

ძლიერი წვიმა და ქარი

უმეტეს რეგიონში მოსალოდნელია 15-30 მმ ნალექი, თუმცა იქ, სადაც შტორმული უჯრედები ერთსა და იმავე ტერიტორიას რამდენჯერმე გადაუვლის, ნალექის რაოდენობამ შესაძლოა 35 მმ-მდეც მიაღწიოს.

ქარის სიჩქარე ძირითადად 70-80 კმ/სთ იქნება, თუმცა სამხრეთ-აღმოსავლეთ პოლონეთში ცალკეულ შემთხვევებში 90 კმ/სთ-მდეც გაძლიერდება.

შტორმების შემდეგ კვლავ მაღალი ტემპერატურა

მიუხედავად ამინდის დროებითი გაუარესებისა, IMGW-ის პროგნოზით, მიმდინარე კვირის ბოლოს პოლონეთში კვლავ ცხელი ამინდია მოსალოდნელი. ქვეყნის უმეტეს ნაწილში ჰაერის ტემპერატურა 30°C-ს გადააჭარბებს.

პოლონეთში მცხოვრებ მოქალაქეებსა და სტუმრებს სპეციალისტები ურჩევენ, 27 ივლისს ყურადღებით ადევნონ თვალი IMGW-ის ოფიციალურ გაფრთხილებებს, მოერიდონ ღია სივრცეში ყოფნას ძლიერი შტორმის დროს და განსაკუთრებული სიფრთხილე გამოიჩინონ გადაადგილებისას.

მოამზადა ნათია ქიმაძემ