ბრიტანეთის, იტალიისა და დანიის ინიციატივით, ლონდონში გამართული ევროპული პოლიტიკური საზოგადოების (EPC) სამიტის ფარგლებში, 41 ქვეყნის ლიდერმა, მათ შორის საბერძნეთის პრემიერ-მინისტრმა კირიაკოს მიცოტაკისმა და კვიპროსის პრეზიდენტმა ნიკოს ხრისტოდულიდისმა, ხელი მოაწერა ერთობლივ დეკლარაციას, რომელიც მიგრაციული პოლიტიკის გამკაცრებას ითვალისწინებს.
ფრანგული და ბერძნული მედიის ცნობით, შეხვედრაზე მონაწილე ლიდერებმა ხაზგასმით აღნიშნეს, რომ აუცილებელია არალეგალური მიგრაციის ნაკადების შემცირების შენარჩუნება, საზღვრების ეფექტიანი დაცვა და ადამიანებით ვაჭრობის წინააღმდეგ ბრძოლაში ინფორმაციის უწყვეტი გაცვლა.
რა იცვლება და ვის ეხება ახალი ინიციატივა?
დეკლარაციის ტექსტში გამოკვეთილია რამდენიმე ძირითადი მიმართულება, რომლებიც ევროპის მასშტაბით საიმიგრაციო კანონმდებლობისა და სასაზღვრო კონტროლის გამკაცრებას ისახავს მიზნად:
- საზღვრების ინტეგრირებული დაცვა: საგანგებო სიგნალების სისტემებისა და ახალი ტექნოლოგიური ინსტრუმენტების დანერგვა მიგრაციული ნაკადების წინასწარ პროგნოზირებისა და მართვისთვის.
- ეეფექტიანი დაბრუნება და რეადმისია: თანამშრომლობის გაძლიერება წარმოშობისა და ტრანზიტის ქვეყნებთან, რათა უზრუნველყოფილი იყოს იმ პირთა დროული და კანონით გათვალისწინებული წესით დაბრუნება, რომლებსაც ევროპაში დარჩენის სამართლებრივი საფუძველი არ აქვთ.
- ინფორმაციის გაცვლა და კონტრაბანდისტებთან ბრძოლა: სამართალდამცავ ორგანოებს შორის ინფორმაციის უფრო სისტემური გაზიარება, რათა დაინგრეს არალეგალური გადაყვანის დანაშაულებრივი სქემები.
- პარტნიორობა წარმოშობის ქვეყნებთან: ადგილზე უსაფრთხოების გაუმჯობესება, ახალი სამუშაო ადგილების შექმნა და ეკონომიკური მხარდაჭერა, რათა პოტენციურმა მიგრანტებმა თავი შეიკავონ საშიში და არალეგალური მოგზაურობისგან.
გამოძიებისა და ოფიციალური უწყებების ინფორმაციით, ევროპელი ლიდერები შეთანხმდნენ, რომ აღნიშნული საკითხი მომავალშიც დარჩება ევროპული პოლიტიკური საზოგადოების მთავარ პრიორიტეტად და შემდეგი განხილვა შვეიცარიაში დაგეგმილ სამიტზე გაგრძელდება.
