ამერიკის შეერთებული შტატები, რომელიც ფეხბურთის მსოფლიო ჩემპიონატის მატჩებს მასპინძლობს, კლიმატური გამოწვევის წინაშე დადგა. სამხრეთ კალიფორნიის რეგიონს ანომალიურად ძლიერი სიცხის ტალღა უახლოვდება, რაც სერიოზულ საფიქრალს უჩენს როგორც ადგილობრივ მოსახლეობას, ისე ათასობით ჩამოსულ გულშემატკივარს. აშშ-ის ეროვნული მეტეოროლოგიური სამსახურის ოფიციალური პროგნოზით, ზოგიერთ რაიონში თერმომეტრის ნიშნული კრიტიკულ ზღვარს გადააჭარბებს.
სინოპტიკოსების განმარტებით, დასავლეთ სანაპიროზე ყალიბდება მძლავრი მაღალი წნევის არეალი. ეს ფენომენი, რომელსაც სპეციალისტები სითბოს გუმბათს უწოდებენ, ცხელ ჰაერის მასებს მიწის ზედაპირთან აკავებს, ხელს უშლის მათ გაფანტვას და იწვევს ტემპერატურის მკვეთრ, ნახტომისებურ ზრდას.
ამინდის ცვლილების ეპიცენტრში ექცევა ანჯელესების ქალაქი - ლოს-ანჯელესი, რომელიც ამჟამად საფეხბურთო ციებ-ცხელებით ცხოვრობს. მოსალოდნელი სიცხე მკვეთრად ასცდება სეზონურ ნორმას: თუკი ამ პერიოდისთვის რეგიონში საშუალოდ 27°C ფიქსირდება, ახლა ტემპერატურამ შესაძლოა 38°C-საც კი გადააჭარბოს.
მეტეოროლოგები განსაკუთრებულ სიფრთხილეს ურჩევენ მათ, ვინც დროს ღია სივრცეში ატარებს, მათ შორის ტურისტულად აქტიურ ზონებში, როგორებიცაა ჰოლივუდი და ბევერლი-ჰილსი. ვითარებას კიდევ უფრო ამძიმებს ტროპიკული ჰაერის მასები, რომლებიც რეგიონში ბახა კალიფორნიის (Baja California) მიმართულებიდან აღწევს. ტენიანობის მატების გამო, რეალური შეგრძნებითი ტემპერატურა გაცილებით მაღალი იქნება და შესაძლოა 35–40°C-ის ფარგლებში მერყეობდეს, რაც ორგანიზმისთვის დამატებითი სტრესია.
კლიმატური ანომალია სერიოზული გამოცდა იქნება სპორტული ინფრასტრუქტურისთვისაც.მიუხედავად იმისა, რომ თანამედროვე არენას გააჩნია სპეციალური დამცავი მექანიზმები და ვენტილაციის ინოვაციური სისტემები, ექსტრემალური გარემო პირობები მაინც მაქსიმალურად დატვირთავს ტექნიკურ რესურსს, რათა მაყურებლისა და სპორტსმენებისთვის კომფორტული გარემო შენარჩუნდეს.
მოამზადა ნათია ქიმაძემ